O Departamento de Normalización Lingüística do Concello da Coruña levou a cabo na segunda metade do ano unha morea de actividades para todos os públicos.

1. Programa Apego 

https://www.coruna.gal/lingua/gl/dinamizacion/apego

Normalización Lingüística do Concello da Coruña organizou, de setembro a decembro, as seguintes actividades para familias con crianzas de 0 a 6 anos no Centro Ágora:

• "Palabras", de Baobab Teatro (auditorio) (1-3 anos). Oralidade tradicional, teatro e música nun mesmo espectáculo. Xogos de repetición, contacontos, cancións e enredos.
• "Estrafalaria", de Xarope Tulú (+3 anos). Espectáculo participativo que combina a narración oral coa manipulación de obxectos para falarnos da diversidade e da liberdade. 
• "Manual para deitarse", de Caxoto (-3 anos). Contos cheos de aventuras que axudan a ir para a cama de boa gana.
• "Cacho animalada", de Vero Rilo e Luis Iglesias (+3 anos). Narración oral e música en directo para contar e cantar coas feras que levamos dentro. 
• "Concertiño para peques", de Félix Arias  (-3 anos). Cancións didácticas en directo para a primeira infancia con suaves melodías.
• "Luppo", de Baobab Teatro (auditorio)  (4-6 anos). Unha obra que fala do ciclo da vida e da relevancia das experiencias das nosas persoas maiores na infancia.
• "Nanocontos", de Raquel Queizás  (-3 anos). Coñecemos as divertidas historias de Nano, unha ra moi simpática.
• "Contos debuxados, debuxos contados", de Caxoto (con Marc Taeger) (+3 anos). Mestura de contadas e pintura en directo coa participación imprevisible das familias.
• "Pelica de burra", de Vero Rilo e Luis Iglesias  (-3 anos). A nosa protagonista aterra nun futuro sen xogos, sen contos, sen música... nun futuro terrible. 
• "Maruxiña", de Laura Sarasola (auditorio)  (+3 anos). Adaptación teatral do conto de Andersen "Polgariña", mais baixo unha nova óptica máis cómica e musical. 
• "Tinta do mar, pequena biografía de Luísa Villalta", de Polo correo do vento  (+3 anos). Conto, ukelele e ilustración sobre o libro que a compañía fixo arredor da escritora coruñesa celebrada este ano polo Día das Letras Galegas.

2. AgoraSón  

• Mercedes Peón no AgoraSón de outono en concerto, acompañada polos grupos de pandeireteiras Raigañas, Xirifeiras, por voces líricas de ConcertoTempo, polo dúo Caamaño&Ameixeiras, Mónica de Nut e Ana Fernández, e o apoio audiovisual de Laura Iturralde. A cabalo do acústico e da electrónica, un concertazo co gallo do Día das Letras Galegas e para promover a lectura en lingua galega e o préstamo de material audiovisual, a través das bibliotecas municipais. 

3. A Coruña das Letras 

• A Coruña das Letras: andainas guiadas por Xurxo Souto pola Coruña máis descoñecida : "Monelos, capital do Concello de Oza", "San Roque de Fóra e Labañou" e "A agra e o cemiterio de Santo Amaro" (con Emma Pedreira) para maiores de 16 anos.