O Servizo de Normalización Lingüística do Concello da Coruña organiza en agosto un concurso nas redes sociais para as familias con nenas ou nenos ata 12 anos co fin de fomentar a escrita.

Como vai ese verán? Desexamos sabelo! Queremos recuperar o vello costume de escribir e recibir cartas ou tarxetas postais, así que se tedes até 12 anos:

1. Contádenos o que estades a facer este verán: viaxar, comer moitos xeados, que libro estades a ler, que pelis, praias ou festas vistes... Podedes xuntarlle un debuxo! Moi importante! Poñede o voso nome, a data de nacemento, un teléfono e un enderezo postal*. Prometemos responder
2. O seguinte é poñerlle un selo, o noso enderezo e ir á caixa do correo até o 31 de agosto: Normalización Lingüística, Lugar da Gramela, 17, 15010 A Coruña.
3. Tedes que redactala en lingua galega (ollo coas faltas, os borranchos). Se aínda non sabedes escribir, poden darvos unha axudiña mamá, papá, alguén da familia ou algunha amizade.

En canto nos chegue a vosa carta ou postal, publicarémola nas nosas redes.

Tanto traballo terá premio seguro! Un agasallo que vos entregaremos presencialmente ao rematar o verán para que así a volta ao cole resulte máis divertida e tres lotiños para as mellores entre estas franxas de idade: 0-4, 5-8 e 9-12 anos (repartirase un agasallo por crianza).

Organiza Normalización Lingüística do Concello da Coruña