As familias con crianzas teñen unha cita no verán. O Servizo de Normalización Lingüística do Concello da Coruña organiza a Festa do Apego, que se celebrará o vindeiro venres 28 de agosto, ás 17.00 h, no Campo da Leña.

O Concello da Coruña quérelles agradecer a todas as familias a súa pertenza ao programa Apego e convidar outras novas a se sumaren a esta iniciativa que pretende axudar á socialización en galego e á transmisión interxeracional da nosa lingua.

A asistencia será gratuíta e sen necesidade de inscrición!!

Haberá dúas actuacións musicais:

• Ás 17.00 h, concerto "Cantaxoga", de Migallas (duración aprox. 50 min)
• A continuación, foliada con Pablo Díaz e Olga Kirk (duración aprox. 50 min)

Teremos tamén un espazo de información do Programa Apego. Agardámosvos!

Cantaxoga é un espectáculo de teatro e música onde María Campos e Carlos Yus interpretan cancións dos discos "Canta connosco!" e "Pan de millo" acompañados por unha sorprendente banda (a música e os coros están gravados pero as voces solistas son ao vivo) e realizan sktechs cómicos relacionados cos contidos das cancións.

Entre outros obxectivos, este espectáculo ten como finalidade demostrar que na lingua galega, ademais da música tradicional, teñen cabida todos os estilos e tendencias musicais: rock, cumbia, rap, reggae, pasodobre, rumba, fusión étnica...

Pablo Díaz e Olga Kirk ofrecerán todo o seu bo facer dentro da música tradicional, adaptando unha foliada para maiores e crianzas. Avalados por anos dentro do circuíto da música tradicional galega, farán gozar a grandes e pequenos.