O Servizo de Normalización Lingüística quere lembrar o finado mestre, escritor e difusor da lingua e cultura galegas Xabier P. Docampo cunha sesión conxunta dun narrador e dúas narradoras de excepción: Caxoto, Charo Pita e Soledad Felloza. Será o próximo martes 9 de abril no Fórum Metropolitano ás 20.00 h nunha actividade dirixida á poboación en xeral incluída na 3.ª edición do Festival de Narración Oral Falando a boca chea.

Xabier P. Docampo naceu en Rábade en 1946 e morreu na Coruña en xuño de 2018. Mestre e escritor, foi autor dunha extensa obra narrativa, da que destacamos as exitosas novelas O misterio das badaladas e A chave das noces.

Recibiu, ademais, numerosos galardóns ao longo da súa carreira. Obtivo o Premio da Feira do Libro da Coruña e o Premio Irmandade do Libro ao Autor do Ano 2009 e A Letra E da AELG en 2014. Foi Premio Rañolas ao Mellor Libro do Ano e Premio Nacional de Literatura Infantil e Xuvenil con Cando petan na porta pola noite. O libro das viaxes imaxinarias foi Premio Isaac Díaz Pardo ao Libro Ilustrado do Ano 2008, Premio Asociación de Escritores en Lingua Galega 2008 e Premio Fervenzas Literarias ao Mellor Libro Xuvenil, 2008. A nena do abrigo de astracán foi a súa derradeira novela, que recibiu o Premio Gala do Libro Galego 2018 e o Premio de Creación Literaria.

A actuación será no auditorio do Fórum Metropolitano e terá unha duración aproximada de 75 min. A entrada é libre até completar a capacidade.