Un punto de encontro da narración oral, de conversas e de aprendizaxes que se acabará convertendo nun espectáculo escénico da palabra e a memoria.

Memoria, expansión do Festival Falando a Boca Chea é unha ampliación do Festival Falando a Boca Chea que se desenvolve principalmente no Concello da Coruña pero que chega tamén a territorios limítrofes como Oleiros, Arteixo, Sada e outros espazos. Esta extensión nace coa idea de deixar pegada nas comunidades que cohabitan o festival, recollendo historias e vivencias das nosas maiores e dos nosos maiores, facéndoas/os partícipes do Festival Falando a Boca Chea.

O proxecto Memoria ten un inmenso valor á hora de crear de arquivo e memoria colectiva: os colectivos participantes removen as historias pasadas para traelas ao presente con toda a implicación emocional que isto compete.

Coa extensión da actividade Memoria a concellos limítrofes da cidade da Coruña, pretendemos recoller historias das veciñas e veciños (de a partir de 65 anos) a través de sesións de reflexión e intercambio entre os colectivos dos nosos e as nosas maiores con narradores e narradoras profesionais (Soledad Felloza, Charo Pita, Caxoto e Ramiro Neira) que saben escoitar, reflexionar e converter todas estas realidades nunha pequena peza de narración oral, tecida coas historias das participantes nestes procesos de creación, para despois compartir co público de cada municipio e do Festival Falando a Boca Chea, no seu primeiro día. 

Esta actividade  de recollida de historias desenvolveuse entre os mesas de xaneiro a marzo 2021 e o proceso verase acompañado por un equipo de vídeo que gravará e recollerá partes desta formación e das propias historias das persoas participantes. Este material tanxible de Memoria facilitará a difusión do proxecto á poboación xeral e contribuirá a crear unha memoria colectiva dos concellos participantes.