Programa de fomento e dinamización do galego na Rede de Escolas Infantís Municipais do Concello da Coruña

Os obxectivos do programa de fomento e dinamización do galego nas escolas infantís do Concello da Coruña, baseados no Plan xeral de normalización da lingua galega, son:

1 Contribuír á galeguización de todos os niveis do sistema educativo e á dotación de materiais e recursos ás escolas infantís municipais, principalmente lúdicos, que poidan axudar na consecución desta galeguización.

2 Axudar a que as familias que teñen o galego como lingua habitual e desexan que as súas fillas e fillos non o perdan ao socializaren, sobre todo coa entrada na escola, poidan lograr o seu obxectivo.

3 Contribuír a que o sistema educativo dispoña dunha planificación orientada a garantir unha competencia semellante nas dúas linguas oficiais, e máis nun contexto tan castelanizado como A Coruña.

4 Ofrecerlles ás EIM máis recursos e materiais para o desenvolvemento das aulas en galego na etapa educativa 0-3 anos, primordialmente lúdicos e didácticos e que fomenten unha imaxe positiva do galego nas crianzas.

Co fin de conseguirmos estes fins, propoñemos realizar 11 pases de:

• "O son que me arrola", da Asociación socioeducativa Antonio Gandoy

"O son que me arrola" é unha proposta musical que ofrece a posibilidade de lles achegar aos/ás máis cativos/as a cultura tradicional galega, da man dos cantos de berce e da instrumentación. Un espazo lúdico onde o alumnado pode experimentar e manipular os diferentes instrumentos de percusión: pandeiros, pandeiretas, bombos, tarrañolas... e outros construídos a partir de materiais de refugallo. A actividade consta de dúas partes: a primeira dedicada á escoita, que dura 20 minutos; a segunda parte dedicada á exploración e manipulación dos instrumentos.

As actividades durarán 50 min aprox. e realizaranse nas propias EIM, ao longo dos meses de marzo, abril e maio de 2026. De cada unha desenvolverase un pase nas escolas Luís Seoane, Os Cativos, Monte Alto, A Caracola e Agra do Orzán. Nas tres EIM que contan cun maior número de alumnado (Arela, Os Rosales e Carricanta) levaranse a cabo dous pases en vez de un.