A Coruña das Letras é a actividade organizada por Normalización Lingüística do Concello da Coruña, dentro do programa de fomento da lingua galega entre a poboación en xeral.

Co fin de traballarmos a lingua, a cultura e a literatura galegas na nosa cidade, e achegándonos a distintos barrios, realizaremos unhas andainas guiadas pola Coruña máis invisible da man do coñecido músico e escritor Xurxo Souto (sobre todo pola súa etapa no mítico grupo coruñés Os Diplomáticos de Monte Alto). 

Aprenderemos máis da toponimia tradicional da cidade, da literatura que habitou nos diferentes barrios que visitaremos e tamén da importancia da lingua nos seus diferentes contextos. 

O calendario será o seguinte:

- Sábado 11 de outubro, ás 11.30 h (inscrición dende o luns 6)  "Visma, o outro mar da Coruña", andaina guiada A Coruña das Letras, con Xurxo Souto

- Sábado 25 de outubro, ás 11.30 h (inscrición dende o luns 20)  "Polo Campo do Carballo e o Camiño Novo", andaina guiada A Coruña das Letras, con Xurxo Souto

- Sábado 8 de novembro, ás 11.30 h (inscrición dende o luns 3)  "As mulleres do muro (peixeiras, redeiras e mariscadoras)", andaina guiada A Coruña das Letras, con Xurxo Souto

INFORMACIÓN XERAL QUE CÓMPRE TER EN CONTA:

- As inscricións faranse exclusivamente a través do correo inscricionslingua@coruna.gal dende o luns anterior a cada unha das andainas, ata que se esgoten as prazas (55). Precísase que se faciliten o nome e os apelidos e un teléfono de contacto.

- A duración é de, aproximadamente, unha hora e media. O lugar de saída para comezar a andaina comunicarase no correo de confirmación da inscrición.

- A actividade diríxese a maiores de 16 anos.