A Coruña das Letras é a actividade organizada por Normalización Lingüística do Concello da Coruña, dentro do programa de fomento da lingua galega entre a poboación en xeral.

Co fin de traballarmos a lingua, a cultura e a literatura galegas na nosa cidade, e achegándonos a distintos barrios, realizaremos unhas andainas guiadas pola Coruña máis descoñecida da man do coñecido músico e escritor Xurxo Souto (sobre todo pola súa etapa no mítico grupo coruñés Os Diplomáticos de Monte Alto). 

Aprenderemos máis da toponimia tradicional da cidade, da literatura que habitou nos diferentes barrios que visitaremos e tamén da importancia da lingua nos seus diferentes contextos. 

O calendario será o seguinte: sábado 9 de maio, ás 11.30 h (inscrición dende o luns 4) "A ruta de Ulises Fingal, as pedras percebeiras da contorna da Torre de Hércules" 

O Grelle, Rabaleira, o Xanrei... Din os aborixes australianos que cada camiño é unha canción. A Torre de Hércules ten moitas melodías. A letra é ben eufónica, Gaivouteiro, o Cabalo, Macallás - nomes das pedras percebeiras-, a música: o océano todo. 

Estaban diante de nós mais non as sabiamos ver. Grazas a Milucho Mariñas descubrimos onde ficaban o Grelle, a Longuiña e o mais o Altar.

Este sabio percebeiro, nado na Agra de Santo Amaro, coñecía as pedras de percebe todas dende Avilés ata Corrubedo. Finou hai uns anos pero vive en nós a súa palabra; cada vez que pronunciamos: Pragueiras, Rabaleira, Sogadoiro, volven vibrar as rochas e a contorna enteira da Torre ilumínase co esplendor das cousas do mar.

O pintor submarino Urbano Lugrís adoitaba asinar como Ulises Fingal os seus escritos literarios. Nel condénsase a tradición clásica das viaxes -Ulises- cos soños célticos todos, representados por Fingal, heroe dos poemas de Ossian. Por iso a ruta de Milucho Mariñas tamén leva este nome. Fin do mundo para a tradición clásica: Torre de Hércules. Tamén Torre de Breogán, atlántica atalaia para albiscar Irlanda.

INFORMACIÓN XERAL QUE CÓMPRE TER EN CONTA:

- As inscricións faranse exclusivamente a través do correo inscricionslingua@coruna.gal dende o luns anterior a cada unha das andainas, ata que se esgoten as prazas (55). Precísase que se faciliten o nome e os apelidos e un teléfono de contacto.

- A duración é de, aproximadamente, unha hora e media. O lugar de saída para comezar a andaina comunicarase no correo de confirmación da inscrición.

- A actividade diríxese a maiores de 16 anos.