Os Paseos virtuais pola Coruña Literaria, que organiza Normalización Lingüística do Concello da Coruña xunto coa Asociación de Escritores/as en Lingua Galega, teñen datas e protagonistas para esta primavera. María Canosa, Olivia Rodríguez González, África López Souto e Xosé Antón Bocixa con Emma Pedreira levarannos, de maneira virtual, por diferentes localizacións da cidade que ambientaron ou inspiraron as súas obras.

O calendario será o seguinte:

• 11 de marzo, con María Canosa. "Peregrina na miña cidade". O paseo rememorará a visión de dúas protagonistas dos últimos libros da autora. Na obra á que fai referencia o título do paseo, a protagonista chega á cidade por mar e sentirase atraída por todo aquilo que é a fachada da cidade pero tamén polo que queda ás súas costas. A segunda protagonista vive dentro da cidade e transita os espazos menos pintorescos e máis prosaicos, o día a día, a cidade que se "usa".https://www.coruna.gal/lingua/gl/detalle/paseo-pola-coruna-literaria-con-maria-canosa-peregrina-na-mina-cidade/suceso/1453755901217

• 18 de marzo, con Olivia Rodríguez. "A Coruña de Luz Pozo Garza". Faremos un percorrido polos espazos vitais e poéticos de Luz Pozo Garza na nosa cidade e deterémonos naqueles lugares máis significativos na súa traxectoria.https://www.coruna.gal/lingua/gl/detalle/paseo-pola-coruna-literaria-con-olivia-rodriguez/suceso/1453755895809

• 25 de marzo, con África López. Concepción Arenal na Coruña: escoitando as 'malas mulleres'. Faremos un percorrido aberto e participativo pola presenza de Concepción Arenal na nosa cidade, incidindo nas súas perspectivas en relación a unha visión humanitaria do castigo, a potencia da amizade entre mulleres, centrada na súa relación con Juana de Vega, e o legado que deixou a súa vida e obra na nosa cidade. https://www.coruna.gal/lingua/gl/detalle/paseo-pola-coruna-literaria-con-africa-lopez-concepcion-arenal-na-coruna-escoitando-as-malas/suceso/1453755909061

• 1 de abril, con Xosé Antón Bocixa e Emma Pedreira. "O éxodo, a ruína". Un paseo pola poética da memoria e da casa baleira e abandonada e que fica no silencio da ruína, desde o audiovisual ao literario, coa mirada diversa e complementaria destes creadores. https://www.coruna.gal/lingua/gl/detalle/paseo-pola-coruna-literaria-bocixa-e-emma-pedreira/suceso/1453755913155