Os edificios de nova construción dispoñen, dende hai uns anos, dun certificado enerxético. Co RD 47/2007 cumpríase parcialmente a transposición das directivas europeas vixentes, pero quedaba pendente a certificación enerxética dos edificios existentes.

A recente publicación no BOE do RD 235/2013 implica que todos os edificios, vivendas e locais arrendados ou vendidos con posterioridade ao 1 de xuño do 2013, teñen que ter un certificado enerxético. Os edificios de recente construción, ao estar afectados polo RD 47/2007, xa teñen o certificado enerxético, pero, que ocorre co resto?

1. O propietario do edificio, ou de parte del, será o responsable de encargar a realización da certificación de eficiencia enerxética.
2. O certificado de eficiencia enerxética será subscrito por un técnico competente que será elixido libremente pola propiedade do edificio.
3. A etiqueta resultante incluirase nas ofertas dirixidas á venda ou arrendamento.
4. O certificado será posto a disposición do adquirente (unha copia no caso de arrendatario) ou exhibido ante o arrendatario.
Finalmente é importante distinguir conceptos como cualificación e certificación:

• A cualificación enerxética é a expresión da eficiencia enerxética do edificio. A eficiencia enerxética determínase de acordo coa metodoloxía de cálculo establecida nun documento recoñecido e exprésase con indicadores enerxéticos mediante a etiqueta de eficiencia enerxética.

• A certificación enerxética é o proceso que verifica a conformidade da cualificación enerxética e conduce á expedición do correspondente certificado.