Co fin de facer de Coruña42 un evento sostible, a Oficina Contra o Cambio Climático do Concello da Coruña realizou o cálculo da correspondente pegada de carbono.
A pegada de carbono define a cantidade de emisións de Gases de Efecto Invernadoiro (GEI) asociadas á realización do evento. Exprésase como cantidade de CO2 equivalente (CO2e).
Para o cálculo da pegada de carbono de Coruña42 empregouse a metodoloxía descrita no estándar internacional “Protocolo GHG: Estándar Corporativo de Contabilidade e Reporte (edición revisada)”, elaborado de forma conxunta polo WRI (World Resources Institute) e o WBCSD (World Business Council for Sustainable Development).

Analizáronse de forma pormenorizada as instalacións e as actividades relacionadas coa realización da carreira. Desta maneira as emisións quedaron clasificadas como directas, correspondendo fundamentalmente ás emisións das motocicletas de seguimento durante a competición, ou indirectas, destacando por encima do resto o impacto dos medios de transporte utilizados polos participantes de Coruña42.

O resultado final foi unha emisión total do evento de 42,89 tCO2e, compensables a través de proxectos de reforestación, enerxías renovables ou desenvolvemento económico e ambiental de comunidades vulnerables.

O obxectivo para a próxima edición de Coruña42 é mellorar o resultado deste ano e contribuír así á loita contra o cambio climático.