O Concello despregará este luns, 23 de setembro, un dispositivo especial de seguridade ante a previsión meteorolóxica, que alerta de fenómenos costeiros adversos no mar e refachos de vento na terra.

Desde as 12.00 horas os servizos de seguridade iniciarán o precintado dalgunhas zonas de parques e xardíns da cidade ante o temporal de vento e polo que hai decretada a alerta amarela. O peche destes espazos, que se manterá ata as 08.00 horas de mañá, 24 de setembro, afectaralles ao Campo de Marte, Torre de Hércules, Parque infantil das Xubias de Abaixo, Parque Carlos Casares, Durmideiras e Xardíns da Maestranza. Pecharase tamén a porta principal de acceso ao parque de Santa Margarida.

Segundo as predicións, os refachos de vento poderían acadar durante a xornada os 80 quilómetros por hora, e o vento pode chegar a forza 7 no mar. O Concello prevé que os fortes ventos que se esperan durante o día de hoxe causarán incidencias tamén no servizo de recollida do lixo, ao impedir a saída do camión pluma, o que lle afecta sobre todo á recollida de papel e cartón e dos contedores soterrados.

O Goberno local pídelle á cidadanía precaución e chama a evitar situacións de risco ante a situación meteorolóxica.