O Corpo de Policía Local da Coruña é un instituto armado, de natureza civil con estrutura e organización xerarquizada.

As nosas metas pasan por motivar a cada membro do Corpo da Policía Local na mellora continua da nosa actividade facéndoos partícipes na toma de decisións, garantindo uns niveis adecuados de formación continua dos/as axentes, solicitando a colaboración cidadá para avanzar en aspectos relativos á convivencia e seguridade cidadá e transformar as necesidades da veciñanza nos nosos propios retos para entre todos lograr que a nosa cidade continúe sendo unha das máis seguras de España e seguimos traballando para mellorar a coordinación co Corpo Nacional de Policía con reunións periódicas e comunicacións diarias a través da Comisión de Coordinación Policial.

O S.E.I.S. (Servizo de Extinción de Incendios e Salvamento) da Coruña ten como obxectivo fundamental proporcionarlle á cidadanía un servizo de calidade que responda ás esixencias vixentes, achegando solucións reais a problemas concretos.

A calidade é un compromiso e unha responsabilidade de cada membro do colectivo que debe plasmarse en accións concretas que reflictan e identifiquen a profesionalidade e calidade do servizo do S.E.I.S.

O obxectivo deste servizo de Protección Civil é, principalmente, dar unha resposta adecuada ante calquera situación de emerxencia, para a protección das persoas e dos bens; pero o radio de acción é máis amplo, abarca desde a prevención, o coñecer os riscos e anticiparse ás súas consecuencias daniñas, a planificación, a actuación e a rehabilitación dos servizos e establecemento da normalidade.

Para lograr estes obxectivos é importante a formación e información da poboación, que supón outro reto para cumprir para os servizos de Protección Civil.

A Lei de emerxencia de Galicia establece un sistema integrado de protección civil e emerxencias, formado por persoal profesional e voluntarios, e encárgalles aos primeiros a dirección e coordinación das actividades que regulan a dita norma.

Esta cidade conta cunha Agrupación de Voluntarios numerosa e cun nivel alto de formación, co adestramento e preparación necesarios para integrarse nos dispositivos cos demais servizos de emerxencia, tanto por terra como por mar.