"Galicia latente" é un proxecto do fotógrafo Eduardo de Martís para achegar ás persoas o valor social, económico e sostible que atesoura a cultura galega no presente. Así mesmo formula unha visión holística desde onde visibilizar os retos e as oportunidades que nos están a conformar.

O proxecto ten como base un estudo-libro homónimo de recollida e divulgación fotográfica da cultura galega (seguramente o único do presente) e as súas múltiples realidades que estamos a vivir en Galicia. Esta obra autoeditada recolle 233 fotografías feitas entre os anos 2020 e 2023, ao longo de máis de 140 concellos galegos.  

A presentación correrá a cargo do seu autor, o fotógrafo Eduardo de Martís, acompañado por diferentes representantes da cultura da cidade.

Agardamos que haxa un debate amplo e convidamos a todas as persoas interesadas no desenvolvemento cultural a asistir e participar na presentación deste proxecto.