En Dúo Vaguedades, Isabel Risco e Fran Rei convértense en Rosalía de Castro e Eduardo Pondal, nunha iniciativa que dá un salto do audiovisual ao escenario e que mestura teatro, humor e música. Na liña habitual desta parella de humoristas, este espectáculo propón unha revisión cómica dunha parte fundamental da nosa cultura, da nosa lingua, do noso xeito de ser e da nosa relación co resto do universo.

Isto é descoñecido para a meirande parte da poboación, pero Rosalía e Pondal conformaron o primeiro grupo de techno de Galicia. Dúo Vaguedades recupera os seus grandes hits.

Dúo Vaguedades, produción de Artefeito S. Coop. Galega e Maquinaria Pesada, é un espectáculo que se achega, en clave de humor, a diversos aspectos que nos definen como galegos e galegas, ao valor da nosa lingua, á riqueza patrimonial e cultural propias de Galicia e ás características que mellor nos definen. Por outra banda, e sempre sen perder o ton cómico da proposta, procura pór en valor algúns dos fitos máis sobranceiros do noso patrimonio histórico e cultural. En definitiva, teatro, música e humor para reivindicármonos.

FICHA TÉCNICA

Dirección: Fran Rei e Isabel Risco

Elenco: Isabel Risco e Fran Rei

Música orixinal: Jerry Noia

Vestiario e atrezzo: Isabel Risco

Fotografía e deseño cartel: Jerry Noia Deseño

Fondo escenografía: Rocío Cibes

Responsable técnico: Abrahán Sande

Produción: Artefeito S. Coop. Galega e Maquinaria Pesada

Pola súa banda, o espectáculo Mulleres con voz, do alumnado do IES Agra, ofrecerá unha visión sobre diversas mulleres relevantes da historia da Coruña: comezando por María Pita e rematando por Luísa Villalta.