A raposiña Chiruca está emocionada. Achégase o Entroido e, coma todos os anos, xa lle toca ir preparando o disfrace. Chiruca quere lucir cada ano o mellor disfrace posible e ademais, e isto é moi importante, sempre o fai ela coas súas propias gadoupiñas.

Pero este ano ten un problema grande: sabe, porque llo dixo súa avoa, que o mellor disfrace que pode facer é o de urrupinca carmirola mais é complicado de facer porque súa avoa só viu a urrupinca unha vez na súa vida cando era noviña e ademais leva moitas cousas que a raposiña non ten.

Por iso se bota a andar á procura deses elementos que non poden faltar no disfrace da urrupinca. Para conseguilos, Chiruca ha ter que lles pedir axuda a moitos animais (algúns máis amigables ca outros, todo hai que dicilo).

É este un obradoiro-contacontos acumulativo e participativo onde as crianzas irán desenvolvendo o conto de Chiruca e o disfrace de urrupinca.

A actividade desenvolverase nas aulas do Centro Ágora e haberá dous pases: ás 10.45 e ás 12.30 horas. 

Organiza Normalización Lingüística do Concello da Coruña dentro do programa Apego.