Concello da Coruña

De onde xorde este proxecto?

O Plan de Actuación Integrado "Conectando a Rolda dos Barrios" (en diante, PAI) non é unha actuación illada, senón que se enmarca nunha estratexia de cidade construída durante os últimos anos para afrontar os grandes retos urbanos do presente e do futuro da Coruña.

A estratexia de planificación integrada para o conxunto do municipio parte da Axenda Urbana da Coruña 2030 (AUAC) . Elaborada en 2022, produto dun proceso de participación e de conformidade cos principios metodolóxicos da Axenda Urbana Española (AUE), a AUAC foi aprobada en setembro dese mesmo ano. Concibida como un documento estratéxico vivo, en 2024 levou a cabo a súa revisión. Esta revisión constitúe a Estratexia de Desenvolvemento Integrado Local (EDIL) da Coruña , a cal se articula arredor de 3 grandes Retos e 12 Obxectivos Estratéxicos.

Para facer efectiva esta Estratexia, a cidade deseñou o PAI para trasladar á práctica os principios e contidos da EDIL aos barrios da Sagrada Familia e dos Mallos, dúas das contornas desfavorecidas con maiores necesidades de rexeneración da cidade. O plan céntrase en mellorar a súa integración urbana e espazo público, reforzar as prestacións sociais e a rede de equipamentos, e aproveitar a oportunidade que supón a implantación da área de intermodalidade lindeira para a cohesión territorial, continuando así coas políticas públicas que pretenden vertebrar a cidade a través dos barrios. Deste xeito, o PAI complementa o programa municipal Plan de Barrios 2025-2027 , unha política clave para a cohesión territorial da Coruña, que conta cunha dotación anual significativa (53,7 M € en 2024.)

A EDIL da Coruña marca o camiño para abordar os retos do futuro, con atención á neutralidade climática, a dixitalización e a cohesión territorial, sen perder de vista a rexeneración urbana, o benestar social e a dinamización da economía local. En consecuencia, esta Estratexia de transformación de cidade non só prioriza a mellora da accesibilidade, a mobilidade e o atractivo urbano destes barrios, e promove unha integración efectiva no tecido urbano coruñés, senón que tamén inclúe medidas e actuacións clave para mellorar a calidade de vida dos seus e das súas habitantes e a cohesión social.

O PAI traduce a Estratexia global de cidade en intervencións concretas, de modo que dá unha cobertura completa e integrada ao conxunto de principios da Estratexia e dálles unha resposta efectiva e localizada.