As crianzas de até os seis anos teñen unha cita para pecharen o verán por todo o alto. O Servizo de Normalización Lingüística do Concello da Coruña organiza a Festa do Apego, que se desenvolverá o vindeiro sábado 1 de setembro de 11.00 a 14.00 h e de 16.00 a 20.00 h no Centro Ágora.

Con ela, o Concello da Coruña quérelles agradecer a todas as familias a súa pertenza ao programa Apego e convidar outras novas a se sumaren a esta iniciativa que pretende axudar á socialización en galego e á transmisión interxeracional da nosa lingua.

A inscrición será gratuíta e terán preferencia as familias que forman parte do Apego.gal no Concello da Coruña. Para elas, abrirase o prazo o luns 27 de agosto para cada unha das actividades. O mércores 29, se quedaren prazas, abrirase ao público en xeral.

Programa de actividades

Ás 11.00 da mañá abriranse diferentes postos que, durante a xornada, estarán a disposición das familias. Neles poderanse inscribir no Programa Apego aquelas persoas que aínda non forman parte del e recibir o seu agasallo de benvida. Ademais, a Biblioteca Ágora terá información para as familias, un espazo adaptado e unha exposición na propia biblioteca para coñecer todos os recursos que lles ofrecen.

Un outro posto de información fará unha mostra comentada para a primeira infancia en lingua galega, feito polas persoas responsables de ali.gal, a páxina de recursos na lingua galega, que lles explicarán a todas as familias interesadas, ao longo do día, todo tipo de materiais para a crianza de pequenas e pequenos.

Por último, as actividades da Festa do Apego van ser as seguintes:

• Dous pases de "Zapatos", de Caramuxo Teatro, ás 11.30 e ás 12.45 h, unha actividade dirixida a crianzas de 1 a 3 anos e que terá unha duración de 30 minutos.
• Obradoiro de construción de instrumentos, cantacontos e bailes con Lydia Botana, unha actividade dirixida a crianzas de 3 a 6 anos, das 12.00 ás 13.30 h.
• Xa pola tarde, Baobab teatro tráenos, ás 17.00 horas, o seu espectáculo para crianzas de 1 a 3 anos de "Por conta delas, contos ricos con sabor a bicos".
• Para os maiores (3-6 anos), tamén ás 17.00 h, Pesdelán convidaranos a bailar co obradoiro "Na punta do pé".
• Por último, Pakolas, coas súas parábolas para crianzas de máis de 3 anos, poralle o ramo á festa cun concerto dunha hora de duración no que haberá sorteo de agasallos e máis sorpresas.

Podes consultar as condicións de cada unha das actividades, así como o xeito de inscrición, na nosa axenda.