Esta edición do AgoraSón terá como protagonistas a Lamatumbá.

O Servizo de Normalización Lingüística, o venres 17 de outubro ás 21.00 horas, volve organizar o concerto do AgoraSón outono (co gallo do Día da Biblioteca e para promover a lectura e o emprego de materiais audiovisuais en lingua galega), en colaboración coas Bibliotecas Municipais da Coruña.

Lamatumbá ten catro discos publicados e multitude de concertos, polo que é unha das grandes referencias da música en galego das festas e verbenas das últimas décadas. Esta formación ourensá abre agora unha nova etapa, logo do seu regreso aos escenarios hai dous anos, con nova imaxe, novos temas e a intención de reinventarse e seguir sendo referencia no panorama musical galego. 

Este verán sacaron un novo tema, Botando leña, que lle dá título á xira. É un berro á resistencia para continuar nun mundo que, en demasiadas ocasións, convida ás derrotas e á rendición. A banda insiste na letra de Botando leña co seu chamamento habitual "á brincadeira", a un xeito de vivir que xira ao redor do gozo colectivo, "inmune á picadura do fracaso".

Este ano cumpríronse 20 anos do seu traballo Lume, (para que saia o sol) e o grupo está orgulloso de seguir oíndo nas voces do seu público os temas máis queridos, como o Licor café, o Desertor, o Reagge dos mariñeiros ou o San Benitín. Agora andan celebrando estes vinte anos e seguen "botándolle leña ao forno".

O evento terá lugar no auditorio do Centro sociocultural Ágora o día 17 de outubro ás 21.00 horas.

A asistencia será de balde, mais precisará a recollida previa de invitación nas Bibliotecas Municipais. 

Repartimento de invitacións

Repartiranse as invitacións, ata esgotárense, co préstamo de material en lingua galega (libros, películas, CDs de música etc.) dende o venres 10 de outubro nas bibliotecas municipais no horario de apertura de cada centro.

Faranse dúas quendas de repartimento: 

• Horario de mañá: a partir das 9.00 h
• Horario de tarde: a partir das 16.00 h

Consulta os horarios de cada unha das bibliotecas e do Punto de Préstamo de Mesoiro.

Repartiranse dúas invitacións por carné e son sen numerar.