No concello de Vilarmaior, moi cerquiña das Fragas do Eume, o Labirinto de Breogán preséntase como unha proposta ideal para gozar en familia; un espazo onde natureza, xogo e aprendizaxe danse a man nunha contorna acolledora e accesible para todos os públicos.

Con máis de 6.000 metros cadrados e milleiros de árbores formando unha gran cruz celta, o labirinto convértese nun escenario perfecto para a aventura compartida.

Dende o primeiro momento, a visita está pensada como unha experiencia participativa. Á entrada, cada grupo recibe un pequeno folleto que propón un reto: completar un encrucillado a partir das pistas que se van atopando ao longo do percorrido.

Pero o xogo vai máis alá do simple entretemento. As palabras que aparecen ábrenlle pequenas portas ao mundo simbólico e cultural da tradición galega e celta. Cada resposta é, ao mesmo tempo, unha descuberta: unha palabra nova, unha imaxe e unha historia.

Deste xeito, o labirinto convértese tamén nun espazo de aprendizaxe viva, onde a lingua vincúlase coa experiencia. Non se trata só de avanzar cara á saída, senón de ir construíndo, paso a paso, un vocabulario que conecta co territorio e a identidade.

O labirinto, ademais, está situado nunha zona de grande valor patrimonial, preto da ruta dos Petróglifos, o que permite introducir de maneira natural nocións sobre a historia máis antiga de Galicia: a Idade do Bronce, os símbolos espirais, a relación entre paisaxe e cultura.

A experiencia pode ser, así, unha primeira aproximación ao noso pasado, feita con curiosidade e vencellada ao xogo.

O percorrido, que adoita levar entre corenta e cincuenta minutos, non presenta dificultade física, polo que resulta axeitado para todas as idades. Ademais, para a xente miúda, hai unha réplica dos labirintos a pequena escala, onde a xente maior pode facer unha paradiña para descansar.

Ao longo do camiño, as instrucións son sinxelas e lévannos a escoller, probar, volver atrás, intentar de novo, mesmo cooperar con outros grupos de xente e crear estratexia. Un proceso que reforza a autonomía, a paciencia e a capacidade de resolución de problemas.

O espazo complétase con servizos que facilitan unha xornada tranquila: un bo aparcadoiro, zonas habilitadas para facer un pícnic en contacto coa natureza e un pequeno bochinche onde tomar algo e descansar. Ao remate do percorrido, a zona de xogos -construída con materiais naturais e integrada na paisaxe- convida a seguir explorando, agora desde o movemento libre e a imaxinación.

Nun contexto onde o lecer infantil adoita estar ligado ás pantallas, o Labirinto de Breogán ofrece unha alternativa saudable e enriquecedora de tempo compartido, aire libre e aprendizaxe vivencial. Un lugar pensado para todas as idades, onde as familias non só se divirten, senón que aprenden xuntas.

Ademais, é pet friendly.

Datos prácticos:

Enderezo: ARMADA, 15637 Vilarmaior, A Coruña

Teléfono: 698 19 50 10

info@laberintodebreogan.com

Horario: 

Xuño

• Sábados e domingos: de 16.30 a 20.00 h
• Última entrada: 19.00 h

Xullo

• Martes a venres: de 17.00 a 20.30 h
• Sábados, domingos e festivo (día 25):
  • Mañá: de 11.00 a 14.00 h (última entrada 13.00 h)
  • Tarde: de 17.00 a 20.30 h (última entrada 19.30 h)

Agosto

• Todos os días:
  • Mañá: de 11.00 a 14.00 h (última entrada 13.00 h)
  • Tarde: de 17.00 a 20.30 h (última entrada 19.30 h)

Setembro

• Sábados, domingos e días 1, 2, 3 e 4: de 16.30 a 20.00 h
• Última entrada: 19.00 h