CORRELINGUA é a denominación que adoptaron de maneira común a partir de 2001 as diversas carreiras en prol do idioma que se convocaron no país e as actividades organizadas durante todo o curso para o alumnado arredor delas. 

O Correlingua, que celebrou o 20 aniversario na edición do 2020, é unha proposta de carácter lúdico, educativo e reivindicativo que pretende convidar a mocidade e os centros de ensino a participar nun acto público de demanda do dereito de crecer en galego e tamén a exercer de maneira efectiva como galegos e galegas a través do uso do noso idioma, única forma de garantir o seu futuro. Está organizado pola AS-PG, a Mesa pola Normalización Lingüística e a CIG-Ensino e contamos coa colaboración de varias institucións como as Deputacións da Coruña, Lugo e Pontevedra así como tamén dos concellos onde se realizan as actividades.

Esta actividade recibiu da Deputación da Coruña en 2016 o VII Premio Rosalía de Castro de Lingua.

En 2022 a gran festa do Correlingua na Coruña celebrarase este 18 de outubro no auditorio do Centro Ágora, organizada polo Servizo de Normalización Lingüística. Presentará o acto Isabel Risco e lerá o manifesto. Logo actuará Meckánika Rolling Band.

Presencialmente asistirá o alumnado e profesorado dos CEIP Alborada, Torre de Hércules, Emilia Pardo Bazán e Zalaeta da Coruña e mais dos IES Urbano Lugrís da Coruña e David Buján de Cambre. Mais chegará a todas e cada unha das aulas de Galicia, xa que se retransmitirá en directo a través da canle de Youtube de Correlingua na seguinte ligazón: https://youtu.be/B3utqXTxU2M