As familias con crianzas teñen unha cita ao remataren as vacacións do verán. O Servizo de Normalización Lingüística do Concello da Coruña organiza a Festa do Apego, que se celebrará o vindeiro venres 5 de setembro, ás 17.00 h, no Campo da Leña.

O Concello da Coruña quérelles agradecer a todas as familias a súa pertenza ao programa Apego e convidar outras novas a se sumaren a esta iniciativa que pretende axudar á socialización en galego e á transmisión interxeracional da nosa lingua.

A asistencia será gratuíta e sen necesidade de inscrición!!

Haberá dúas actuacións musicais:

• Ás 17.00 h, concerto "C@nto contigo", de Paco Nogueiras (duración aprox. 50 min)
• A continuación, concerto "25 aniversario" de Mamá Cabra (duración aprox. 50 min)

Teremos un espazo de información do Programa Apego. Agardámosvos!

C@nto contigo é un espectáculo onde Paco Nogueiras fai un percorrido polas cancións máis coñecidas dos seus traballos Brinca vai!, Radio Bulebule e Extra!, sacando a nosa lingua a voar de xeito lúdico e divertido. Neste "grandes éxitos", coñeceremos un amplo abano de estilos musicais, dende o techno ao rock, pasando polo reggae ou a música electrónica, aínda que sen esquecer as influencias tradicionais. 

Mamá Cabra cumpre 25 anos e quere celebralo cun concerto moi especial! Gloria Mosquera e as súas músicas cantarán os grandes éxitos do grupo, dende a súa creación ata o presente, dende os primeiros traballos discográficos ata as últimas novidades. Unha actuación musical chea de ritmo para que as familias canten, bailen e se divirtan cos temas de Ola, ola, la, Cartas que veñen e van, Eu cociño, ti cociñas? e A fraga do meu avó!