A Coruña das Letras é a actividade organizada por Normalización Lingüística do Concello da Coruña, dentro do programa de fomento da lingua galega entre a poboación en xeral.

Co fin de traballarmos a lingua, a cultura e a literatura galegas na nosa cidade, e achegándonos a distintos barrios, realizaremos unhas andainas guiadas pola Coruña máis descoñecida da man do coñecido músico e escritor Xurxo Souto (sobre todo pola súa etapa no mítico grupo coruñés Os Diplomáticos de Monte Alto). 

Aprenderemos máis da toponimia tradicional da cidade, da literatura que habitou nos diferentes barrios que visitaremos e tamén da importancia da lingua nos seus diferentes contextos. 

O calendario será o seguinte: sábado 30 de maio, ás 11.30 h (inscrición dende o luns 25) "Na procura do antigo Gremio de Mareantes"

O Gremio de Mareantes, o gremio dos pescadores da sardiña, foi a maior agrupación profesional da cidade. A comezos do século XVI, estaba integrado por máis de seiscentos confrades, coas súas respectivas familias. A súa igrexa deulle nome á rúa máis importante da Pescaría: Santo André.

O día do patrón, corenta mariñeiros novos bailaban alí unha danza na súa honra.

En 1589, no asalto do corsario Drake, os mareantes distinguíronse na defensa da Coruña. A súa igrexa e hospital foron incendiados polos ingleses. O predio ficou en estado ruinoso, ata que, no século XIX, un empresario local, Eusebio da Guarda, construíu alí un novo templo. Logo dun longo preito cos mariñeiros, ficou coa propiedade do edificio.

A memoria dos mareantes parecía desaparecer para sempre mais, hai un par de décadas, o historiador Santiago Daviña foi quen de atopar unha copia das súas ordenanzas, no arquivo xeral da Armada en Viso del Marqués (Ciudad Real).

As pegadas do Antigo Gremio de Mareantes esténdense pola Pescaría cara ao Parrote. Faremos unha viaxe iniciática polas propias orixes da cidade, ese libro que se le camiñando, como dicía Agustín Fernández Paz.

INFORMACIÓN XERAL QUE CÓMPRE TER EN CONTA:

- As inscricións faranse exclusivamente a través do correo inscricionslingua@coruna.gal dende o luns anterior a cada unha das andainas, ata que se esgoten as prazas (55). Precísase que se faciliten o nome e os apelidos e un teléfono de contacto.

- A duración é de, aproximadamente, unha hora e media. O lugar de saída para comezar a andaina comunicarase no correo de confirmación da inscrición.

- A actividade diríxese a maiores de 16 anos.