Programa de fomento e dinamización do galego na Rede de Escolas Infantís Municipais do Concello da Coruña

Os obxectivos do programa de fomento e dinamización do galego nas escolas infantís do Concello da Coruña, baseados no Plan xeral de normalización da lingua galega, son:

1 Contribuír na galeguización de todos os niveis do sistema educativo e na dotación de materiais e recursos ás escolas infantís municipais, principalmente lúdicos, que poidan axudar na consecución desta galeguización.

2 Axudar a que as familias que teñen o galego como lingua habitual e desexan que as súas fillas e fillos non o perdan ao socializaren, sobre todo coa entrada na escola, poidan lograr o seu obxectivo.

3 Contribuír a que o sistema educativo dispoña dunha planificación orientada a garantir unha competencia semellante nas dúas linguas oficiais, sobre todo nun contexto tan castelanizado como A Coruña.

4 Ofrecerlles ás EIM máis recursos e materiais para o desenvolvemento das aulas en galego na etapa educativa 0-3 anos, principalmente lúdicos e didácticos e que fomenten unha imaxe positiva do galego nas crianzas.

Co fin de conseguirmos estes fins propoñemos realizar:

• 11 pases escolares do espectáculo "Ollo, piollo!", de Chus Álvarez 

Os espectáculos realizaranse nas propias EIM, entre marzo e maio de 2023, nas datas e horarios que entre as dúas partes se acorden. De cada actividade desenvolverase un pase nas escolas Luis Seoane, Os cativos, Monte Alto, Caracola e Agra. Nas tres EIM que contan cun maior número de alumnado (Arela, Os Rosales e Carricanta) levaranse a cabo dous pases do espectáculo en vez de un. 

'Ollo, piollo!' é un espectáculo de narración oral para descubrir o mundo con ollos ledos. Contos e cantos para xogar, con imaxes e palabras. Nesta actividade emprega a súa voz (para contar e cantar) e libros físicos ou outros pequenos obxectos, como luvas, para narrar cos dedos das mans. Nos seus contos de crocodilos, gatos ou eirugas xogará coas rimas e as cores.

Idade: de 0 a 3 anos

Duración: 30 minutos aprox.

Chus Álvarez é filóloga, educadora infantil e máster en estudos avanzados de teatro. É tamén diplomada en arte dramática e ten ampla formación como actriz. Leva anos dedicada ao mundo dos nenos e das nenas, tanto impartindo aulas de teatro como dirixindo e actuando para elas. Á parte de traballar como narradora oral e docente teatral, co-creou Teatro da Semente, unha compañía teatral especializada en teatro para bebés, coa que xirou por Galicia, España e Portugal de 2012 a 2018. Traballa como narradora oral desde 2003 en bibliotecas, feiras do libro, escolas infantís etc. e tamén impartiu obradoiros e relatorios de narración oral, linguaxe oral e expresión dramática para diferentes entidades. Como narradora de concertos didácticos traballou coa Orquestra Sinfónica de Galicia ou a Banda Municipal de Música de Coruña, por exemplo.