O Servizo de Normalización Lingüística do Concello da Coruña ten establecida, entre as súas funcións, a de realizar diferentes programas de dinamización lingüística para avanzarmos na normalización social do galego, entre os que se atopa o Falamos secundaria. Este programa pretende promover a interacción entre a escola e a súa contorna para facer máis rendibles os recursos e os esforzos deses dous ámbitos en prol da normalización do galego.

Con este fin, imos desenvolver a seguinte actividade no auditorio do Centro Ágora (dunha duración aproximada de 70 minutos):

• 2 charlas (10.00 e 12.00 h) o mércores 28 de outubro de "O galego nas redes sociais", de Orgullo Galego, dirixidas ao alumnado de 1.º e 2.º de bacharelato dos IES da cidade.

As solicitudes de inscricións realizaranas os centros interesados, dende o 15 de setembro ata o 15 de outubro, para os centros públicos. Se quedasen prazas libres, abrirase un segundo prazo, para os centros concertados, dende o 15 ata o 26 de outubro. 

A solicitude de asistencia realizarase a través da web de Educación, en https://edu.coruna.gal/coruna_educa_centros/main/login.php

Deberannos indicar o número de alumnado e de profesorado acompañante. Confirmaráselles a inscrición aos centros por orde de solicitude, ata que se complete a capacidade da planta baixa do auditorio (300 butacas). Débese estar no Centro Ágora con 20 minutos de antelación.

A actividade é de balde. O transporte (de precisalo) correrá por conta de cada centro escolar.

Estas charlas formativas teñen como obxectivo mostrarlle ao alumnado a situación do idioma galego en Internet, dar a coñecer distintas persoas creadoras de contido no noso idioma, explicar o éxito da plataforma Orgullo Galego etc. 

Orgullo Galego é unha comunidade en redes en lingua galega que naceu no ano 2016 en Facebook co obxectivo de divulgar a nosa lingua, cultura e tradicións mais tamén para falar de actualidade, humor, historia etc. con Galicia como eixe central. Un dos obxectivos principais é normalizar o uso do galego nas redes sociais e mostrar que o galego non resta, ao contrario, ten un valor engadido e con el podemos chegar a milleiros de persoas. Outro dos obxectivos é empregar as novas tecnoloxías para dar a coñecer a nosa historia e cultura dun xeito moderno que contribúa a chegar a todas as capas da sociedade mais especialmente á xente máis nova.

Obxectivos do programa Falamos secundaria:

• Promover e fomentar a utilización da lingua galega nos centros de educación secundaria da Coruña.
• Asegurar a galeguización de todos os niveis do sistema educativo, tanto no ámbito docente coma no das relacións interpersoais entre os distintos membros da comunidade educativa.
• Garantir que os produtos de máxima difusión e demanda poidan chegar en galego á sociedade galega.
• Estimular nas xeracións máis novas actitudes favorables que se traduzan nun uso xeneralizado da lingua galega.
• Superar vellos prexuízos, presións globalizadoras e inercias negativas.
• Procurar espazos de uso e de lecer en lingua galega que sexan de calidade para o alumnado dos centros de ensino da nosa cidade.

Máis información a través de inscricionslingua@coruna.gal