Este mércores, a Xunta de Goberno Local deu luz verde ao proxecto da ordenanza de uso das praias da cidade, un novo marco normativo co que o Concello busca facer compatible o uso e disfrute das praias coa seguridade das persoas usuarias e, en paralelo, o mantemento sostible e protección natural dos areais.

Un dos aspectos clave da ordenanza é a prohibición de altofalantes nas praias sempre que resulten molestos, unha medida que, como precisou a alcaldesa, Inés Rey, "vén derivada das incomodidades que producen ás persoas usuarias e, ademais, porque o ruído dos altofalantes pode interferir nas recomendacións de seguridade e nos avisos de alarma que emite a megafonía do persoal de salvamento".

O texto tamén estipula a prohibición de cans nas praias entre o 1 de xuño e 30 de setembro, excepto na cala canina de Bens. Si se autorizaría a presencia de cans de salvamento, auxiliares ou de asistencia, como os que axudan a persoas invidentes. Ademais, tamén se prevé, a futuro, a posibilidade de que o Concello defina áreas de esparexemento canino temporais ou permanentes nas praias.

Por outra banda, na tempada de baño está previsto que se permitan as actividades de deporte, sempre e cando se leven a cabo a un mínimo de 10 metros das persoas usuarias. "O Concello poderá habilitar zonas específicas nas praias para a práctica de xogos e deporte se o ve oportuno", precisou a alcaldesa.

Ademais, con esta ordenanza ábrese a posibilidade de declarar zonas sen fume.

A alcaldesa lembrou que o texto da ordenanza contou coas aportacións da consulta pública aberta o ano pasado polo Concello para recoller as achegas da cidadanía. Recibíronse un cento de suxestións, que se tiveron en conta para formular esta nova normativa.