A súa historia está unida ás festas do Nadal e gústalle compartir connosco estes fermosos días.

É un pastor mangallón e bo, de mirada doce e longas barbas coloradas que, co seu abrigo cheo de remendos e a grandes alancadas, percorre Galicia enteira. Durante o ano fabrica carbón, vive dos froitos silvestres, caza, recolle mel e fai aparecer, coas pólas dos bosques, os xoguetes que a madeira agocha. En decembro baixa ás vilas, visita aos nenos casa por casa e déixalles como regalo castañas quentes e divertidos agasallos de madeira.