Abrir unha práctica escénica é unha clase práctica onde tratar as claves da composición escénica de forma participativa. Un lugar onde xogar a ser directores de escena e investigar como se deciden os distintos elementos dunha creación de danza ou teatro contemporáneo coa vontade de entender mellor os segredos da construción escénica.

Rut Balbís é unha coreógrafa, intérprete e profesora de danza contemporánea, ademais de directora da compañía de danza galega Pisando Ovos. Nos máis de dez anos de vida da compañía os seus traballos atoparon un notable recoñecemento, participando en numerosos programas e festivais internacionais dentro do panorama actual das artes do movemento.

Laura Villaverde é actriz e creadora, así como integrante da compañía de teatro galega ArtesaCía, unha compañía nada entre Galicia e Nova York, da que destaca a interesante mestura de elementos audiovisuais nos seus últimos traballos escénicos que están a ser moi ben acollidos nos distintos encontros e festivais dos que participan. En paralelo ao traballo de ArtesaCía, Laura Villaverde acostuma participar nos procesos creativos da recoñecida compañía SITI Company de New York.