Nesta actividade as familias vivirán o teatro dunha maneira particular: entrarán no espazo escénico para percorrelo, manipulalo e facelo seu. A través do corpo, do movemento, do xogo e dos obxectos, as familias converteranse en participantes activos e en donos e donas temporais dese territorio. Poderán experimentar, inventar e descubrir que sucede cando non reciben todas as respostas nin todas as instrucións.

A sesión parte do traballo realizado nos encontros de ABURRIMENTO vinculados ás axudas REGO, pero dá un paso máis cara a futura peza escénica. Ademais de vivir unha experiencia artística, as familias participarán no seu proceso de creación: as súas reaccións, decisións e maneiras de relacionarse co espazo axudarannos a investigar e construír o espectáculo que está por vir.