Amena Karimyan é enxeñeira e unha apaixonada pola astronomía. Tamén lle apaixona ensinarlle astronomía a outras mulleres e nenas do seu país, Afganistán, e por iso en 2018 fundou na cidade de Herat, co estudante de enxeñaría Sohail Karimi, o Grupo Astronómico Kayhana, un colectivo educativo.

Nun país no que non existía nin unha facultade nin un centro de formación en astronomía, o grupo Kayhana abordou o obxectivo de dar a coñecer as ciencias do ceo. A través dun programa de seminarios e obradoiros, Kayhana fíxose un oco nas escola e achegou o coñecemento científico á mocidade afgá, e moi en especial ás nenas e ás mulleres.

O regreso ao poder dos talibáns en 2021 impuxo no seu país graves restricións á educación, pero o grupo Kayhana segue traballando desde Alemaña, país onde tivo que refuxiarse Amena Karimyan.

Na súa conferencia fará unha breve recensión cultural e histórica da astronomía afgá, da historia e o programa educativo do grupo astronómico Kayhana e dos seus obxectivos para o futuro.

Impartirá a charla en lingua farsi, pero haberá tradución consecutiva ao castelán.