Youfeelm, a plataforma de cinema baixo demanda en salas, xunto ás súas persoas usuarias queren conseguir o público necesario para proxectar a película o próximo 20 de outubro Un dos clásicos do cinema dos 80, 'Los Goonies', dirixida por Richard Dorner, quere volver á gran pantalla nos Cantones Cines da Coruña, coa condición de que o apoio do público acompañe a campaña de crowdfunding posta en marcha en youfeelm. En caso de conseguir o público necesario, a cita será o próximo 20 de outubro, en sesión única, ás 20.30 h, nunha oportunidade de revivir as aventuras de Mikey, Gordi, Data e o resto dos seus amigos. 'Los Goonies', á procura do tesouro de Willy "o chosco". O filme conta a historia de Mikey que vive nun pobo costeiro de Estados Unidos onde, cos seus amigos do barrio e o seu irmán maior, forman un grupo denominado "Los Goonies". Nunha aburrida tarde, el e os seus amigos soben ao faiado da súa casa. Buscando entre trastes e cousas antigas, descobren o mapa dun tesouro da época dos piratas que deciden buscar e que lle podería axudar ao pai de Mikey, que está a pasar apuros económicos. A procura do tesouro levaraos a unha aventura na que sortearán mil perigos. Youfeelm, a nova forma de ver e sentir o cinema, ofrece o seu servizo a través de toda España e conta con máis de setenta cinemas a través de todo o país, entre os que se atopan os Cantones Cines, e un catálogo de títulos que inclúe películas de todos os xéneros e nacionalidades, con especial foco no cinema independente, de autor, de novos creadores e clásicos. Con Youfeelm impúlsase a cinecracia, que xa fixo posible case un cento de eventos por toda a península. A plataforma ofrécelle ás persoas espectadoras ou a calquera grupo a posibilidade de solicitar eventos nos que visionar películas no cinema da súa elección e na data e hora que desexen.

Ver trailer