Para presentar a El Consorcio é inevitable remitirse a Mocedades, xa que todos os seus integrantes pertenceron a ese grupo, a única formación hispana que vendeu un millón de copias dun sinxelo cantado integramente en castelán. Xoias como ‘Tómame o déjame‘, ‘El vendedor', ‘La otra España‘, ‘Qué pasará mañana‘, ‘Secretaria‘, ‘Quien te cantará‘, ‘Desde que tú te fuiste‘, ‘Amor de hombre‘, ‘Dónde estás corazón‘, ‘Le llamaban loca‘ e moitas máis, marcan a súa extensa e intensa traxectoria con catro décadas de historia da música española.

Unha historia que comezou alá a finais dos anos 60, cando oito mozos estudantes de Bilbao apaixonados da música folk reuníronse para dar renda solta á súa vocación musical. Nacera Mocedades, un dos grupos máis emblemáticos e fundamentais da música española do último medio século, que ten a súa continuación en El Consorcio, grupo formado por Amaya Uranga, Estíbaliz Uranga, Iñaki Uranga, e Carlos Zubiaga, todos ex-Mocedades.

O tempo pasa, pero o que queda son as súas magníficas voces, cun empaste e unha calidade sen igual, postas ao servizo dunhas cancións imperecedoiras, moitas feitas á medida para crear un corpo único.