Emigrantas: Emerxer do silencio propón un percorrido a través de arquivos históricos, fotografías, instalacións artísticas, materiais audiovisuais, cartas, obxectos persoais e testemuños gravados, que permiten reconstruír as múltiples formas de partir, traballar, crear, resistir e retornar das galegas que viviron a emigración. A exposición detense nas experiencias cotiás e colectivas: o traballo, a aprendizaxe, a organización social, os coidados, a escritura e a transmisión da memoria. Ao tempo, poñen en valor o labor das investigadoras, historiadoras e creadoras que fixeron posible recuperar estas voces, revisando arquivos, listas de pasaxeiras e percorrendo vilas e territorios de todo o mundo na procura dos relatos das emigradas.

O resultado é un diálogo entre patrimonio documental e creación contemporánea, que convida a mirar con atención e a interrogar os silencios herdados, construíndo unha memoria compartida que contribúe a comprender mellor o presente.

A mostra poderase visitar no Quiosco Alfonso, no seu horario habitual, con entrada gratuíta ata o 3 de maio.

ACTIVIDADES DE CLAUSURA

Taller familiar: Cartografía téxtil para as emigrantas

Taller participativo dirixido a familias, no que, a través do traballo con tea e técnicas sinxelas de colaxe téxtil inspiradas nas pezas de Carmen Arias de Castro, "Mimina", construirase un mapa colectivo de historias reais de emigración vinculadas ás experiencias familiares e afectivas das persoas participantes. A actividade aborda a emigración como experiencia vital, intergeneracional e emocional, fomentando a creación colectiva e a transmisión da memoria.

• Data: sábado, 25 de abril
• Hora: 12:00 h
• Público destinatario: público familiar
• Capacidade: 12 familias (cada nena/neno virá acompañado dun adulto)
• Inscricións: https://ticketing.coruna.gal/kioscoalfonso/emigratas/
• Apertura do prazo de inscriciones: luns 20 de abril ás 10:00 h

Visitas guiadas á exposición

As visitas guiadas ofrecen un percorrido comentado pola exposición, contextualizando as pezas e os discursos expositivos sobre os procesos migratorios, con especial atención ás experiencias das mulleres emigrantes.

• Sábados, 25 de abril e 2 de maio
• Hora: 18:00 h
• Público destinatario: público xeral
• Reserva das visitas guiadas: Teléfono: 981 189 898 (de luns a venres de 8:00 a 15:00 h) Correo electrónico: kioscoalfonso@coruna.gal

Presentación da revista EMIGRANTAS: EMERXER DO SILENCIO

Presentación pública da revista editada con motivo da exposición EMIGRANTAS: EMERXER DO SILENCIO, concibida como soporte editorial complementario da mostra. A publicación amplía e contextualiza os contidos expositivos, ofrece lectura especializada e funciona como memoria documental do proxecto, sendo un material esencial para o labor divulgativo e educativo asociada á exposición.

A revista recompila historias, testemuños e información biográfica de diferentes "emigrantas", permitindo profundar nas experiencias da emigración feminina e poñendo en valor as súas traxectorias e memorias.

• Data: luns 27 de abril
• Hora: 19:00 h