Na exposición, organizada pola Asociación Histórico Cultural The Royal Green Jackets, a Asociación de Amigos do Museo Militar e Tesouros de Galicia, poden verse obxectos orixinais do barco, como os prismáticos do capitán, páxinas da prensa da época que recollen a noticia e gravados nos que se poden ver aos tres mariñeiros sobreviventes ou ás familias dos falecidos no porto de Southampton.

A traxedia do cruceiro británico é, como di Juan Campos, o «símbolo dos naufraxios» da Costa da Morte, unha traxedia de lenda que marcou a alma colectiva de toda unha comarca. O Serpent partira de Playmouth á unha e media da tarde do 8 de novembro con destino á costa occidental africana. Levaba 176 homes. Ía substituír ao seu xemelgo Archer na patrullaxe das costas sudafricanas. Era un torpedeiro de aceiro reforzado na liña de flotación, de 68,58 metros de eslora e 10,97 de manga, que ao engadirlle seis canóns a súa proa cabeceaba en exceso.