A terceira edición do programa Talentos Inclusivos programa o venres 16 de xuño na Domus unha feira científica como peche ao curso 2022-2023. Neste evento preséntanse os proxectos desenvolvidos polos dez centros educativos participantes, da provincia da Coruña e, por primeira vez, de Ourense.

Entre os proxectos elaborados poderán verse exemplos de retos como videoxogos clásicos para utilizar en terapias de rehabilitación, bingos adaptados, mesas sensoriais ou diferentes adecuacións de boquillas para pintar.

Durante o desenvolvemento da feira terá lugar ademais unha xincana por equipos que consistirá en responder unha pregunta sobre cada expositor. Entre os equipos con máis respostas correctas realizarase un sorteo, cuxo gañador recibirá como premio unha impresora 3D.

O proxecto Talentos Inclusivos é un programa que ten o dobre obxectivo de fomentar as vocacións TIC entre o alumnado e dar visibilidade á discapacidade. Ao redor de 200 estudantes de Secundaria participaron nesta terceira edición.