Tiruleque é unha das bandas de música galega máis veteranas do país. Xurdiu na Coruña hai máis de vinte anos e criouse nese mundo de romarías, foliadas, bailes, festas populares e demais encontros que son celebracións da cultura galega en si mesmos.

Un mundo vivo e rico, no que calquera faísca espontánea provoca unha celebración, e onde todo o mundo ten, na música, no canto ou no baile, o seu lugar.

Neste cuarto traballo discográfico, a banda coruñesa xoga coa forza das voces femininas que deron forma á tradición da música cantada en galego. Esas avoas incansables de corpos vellos e espíritos novos, que foron as que nos transmitiron non só as pezas, senón tamén esa enerxía, ese lume interior co que xa iluminaban os encontros de hai décadas.

Tiruleque potencia a enerxía hipnótica da pandeireta co transo das liñas de baixo, combina o brillo da gaita coa forza do metal, mestura a percusión tradicional coa moderna... coa particularidade de ser sempre fiel ao espírito verdadeiro das músicas sen artificios innecesarios, respectando o sentido orixinal, dentro da foliada, para cantar e bailar como sempre se fixo.

Nestes anos de historia, Tiruleque recorreu a práctica totalidade dos festivais de música galega e celta o país, e representou a música galega en festivais internacionais como o de Lorient e o Festival Internacional do Mundo Celta de Ortigueira, entre outras moitas actuacións pola xeografía do Estado, e é considerado unha referencia no mundo da música para o baile tradicional galego.

VENDA DE LOCALIDADES

• Venda en liña: Ataquilla.com
• Venda no despacho de billetes do Teatro Colón: unicamente o día do concerto, só se quedan dispoñibles
• Venda no despacho de billetes central da praza de Ourense: de luns a venres (excepto festivos) das 11.00 ás 15.00 h e das 16.30 ás 19.30 h