Tras a publicación das bases do programa no Boletín Oficial da Provincia da Coruña, o Concello abre o prazo de presentación de solicitudes para unha nova edición do programa Idiomas do mundo durante os 10 días hábiles posteriores á data de publicación, é dicir, do 3 ao 13 de febreiro, ambos os días incluídos.

Pasos para inscribirse no programa

As persoas solicitantes deberán seguir os seguintes pasos para inscribirse no programa:

1. Facer a inscrición en liña na web municipal de educación, a través da ficha específica do programa. Unha vez feita a inscrición o sistema elabora un xustificante de confirmación que se envía ao correo electrónico facilitado na solicitude e que debe ser achegado co resto de documentación a presentar no Concello para formalizar a solicitude. Este xustificante ten un número de identificación (IDE) que será o de referencia de cada expediente no proceso.
2. Presentar por rexistro a documentación complementaria do expediente e o xustificante de confirmación da inscrición en liña (documento do apartado anterior) debidamente asinado pola persoa solicitante e os seus titores legais. O nome da persoa que debe aparecer como interesada na solicitude presentada por rexistro debe de ser o do/a menor que solicita a bolsa.

IMPORTANTE: unha vez cuberta a ficha de inscrición en liña é imprescindible entregar por rexistro toda a documentación que vén establecida nas bases.