"Cada imaxe encerra unha historia que parece deter o tempo á espera de que as persoas espectadoras continúen o relato onde a súa cámara o parou. Unha visión poliédrica de lugares que resultarán para moitos de nós familiares, e que baixo a mirada de Cubillo adquiren novos matices e significados. Atmosferas únicas, que nos convidan a penetrar en lugares despoboados onde a presenza humana se revela en detalles nimios como un cartón de ovos, un anuncio tachado, ou unha lata de cervexa. É precisamente esta particular maneira de mirar, froito dun proceso de traballo intenso realizado durante anos, a que lle permitiu desenvolver un imaxinario propio dunha gran coherencia a nivel formal", manifesta Nuria Blanco, directora de Moret Art.

"A ollada de Isra Cubillo revela unha narración da cidade na que o underground choca coa beleza contemplativa e fráxil. Constrúe, dalgunha forma, o limiar de paso cara a outro relato urbano, un no que como un benshi xaponés móstralles ás persoas espectadoras as pequenas particularidades do escenario que habita. Seguindo quizais a idea enunciada por Diamela Eltit de que o corpo é o vagabundo por excelencia, o paseo pola cidade que propón Cubillo non é errante senón curioso, sarcástico, crítico e sensible, un estraño fío argumental que guía o seu relato urbano persoal. Un defecto de artista ou un impulso irreparable", reflexiona a doutora en Arquitectura Nuria Prieto a respecto deste proxecto expositivo.

Israel Cubillo (A Coruña, 1973). Fotógrafo autodidacta, vencellado ao mundo da fotografía dende a súa infancia (o seu pai traballou durante 40 anos nun laboratorio fotográfico e a súa nai editaba fotografías na casa) formouse con artistas e fotógrafos como Bernard Plossu, Alberto García-Alix, Vari Caramés, Ricky Dávila, Laura González-Flores, Ricardo Cases, Montserrat Soto, Carlos Cánovas ou José Manuel Castro Prieto. En 2005 é nomeado para a bolsa de formación fotográfica da Fundación Santa María de Albarracín, en 2001 participa en Descubrimientos de PHE, en 2012 participa en Novos PHE, e en 2014 é finalista do premio de fotografía Luis Ksado.