O vindeiro sábado 16 de xuño o Centro Oceanográfico da Coruña do Instituto Español de Oceanografía (IEO) organizará a XI edición de Xornada de Portas Abertas para dar a coñecer os seus traballos de investigación.

Os científicos e técnicos do IEO explicarán de forma próxima algúns dos aspectos da ciencia dos océanos. Para iso deseñaron varias actividades:

• A VIDA MARIÑA AO MICROSCOPIO: mediante microscopios poderemos observar organismos planctónicos e bentónicos do noso litoral mariño así como distintos métodos de obtención das mostras.

• EXPOSICIÓN DE APARELLOS OCEANOGRÁFICOS DE MOSTRAXE: Presentaremos os equipos oceanográficos de mostraxe, coas oportunas explicacións do seu funcionamento e manexo.

• OS PEIXES E AS REDES: a través dun módulo interactivo mostramos a selectividade das artes de pesca e a problemática dos peixes inmaturos e os descartes.

• AS VIAXES DOS PEIXES: explicaremos a importancia dos estudos de marcado e a recaptura dos peixes.

• A OCEANOGRAFÍA EN FEMININO: na que faremos un repaso sobre a achega das mulleres ao estudo dos nosos mares.

• O CORAZÓN DO PLANETA: por medio de experimentos de física e química mariña mostrarémosvos a distribución da temperatura oceánica, a salinidade e o pH da auga de mar.

• LIXOS NO MAR: continuaremos coa concienciación sobre a eliminación dos lixos no mar. A nosa proposta é un CONCURSO DE RECICLAXE DE LIXOS MARIÑA, cuxos resultados poderedes ver nun recuncho das nosas instalacións oceanográficas.

• ESPAZO INFANTIL: cuxa proposta estrela é o Concurso de Debuxo María Hermida.

• ROBOTS SUBMARINOS: pilota as nosas maquetas teledirixidas de robots submarinos para a obtención de mostras.

• COLECCIÓNS MARIÑAS: presentarémosvos a colección de exemplares mariños colleitados por compañeiros dos nosos Centros Oceanográficos.

• Paneis diversos: con temática mariña.

• Posa co "photocall" do IEO: os/as participantes terán oportunidade de facerse unha foto xunto a un peixe espada de tamaño real e outros animais mariños.