Kafka namorado presenta unha historia real e complexa que rematou de forma dramática ante a imposibilidade de realización do amor que sentían Franz Kafka e Felice Bauer. Felice, unha muller moi moderna na súa época, directiva dunha firma comercial de Berlín, en continua viaxe de negocios, economicamente independente, coñeceu a Franz en casa de Max Brod, amigo común que daría a coñecer a Kafka ao mundo. Franz, baixo a influencia traumática da autoridade paterna e incapaz de liberarse do influxo familiar e do seu traballo de funcionario, buscaba desentrañar os enigmas da existencia humana a través da escritura literaria. E malia que ambos estaban de verdade namorados, a súa relación converteuse nun constante malentendido no que, insatisfeitos ambos, fixéronse sufrir ata abandonar os seus plans de matrimonio, tras tres sucesivos compromisos e rupturas. Kafka chegou á conclusión de que unha vida matrimonial, burguesa, familiar e ordenada era incompatible co seu anhelo artístico, e acabou sacrificándoa –sacrificándose el mesmo- para legarnos a súa obra, ese monumento literario que inaugura a modernidade e define de modo exhaustivo a sensibilidade existencial do home contemporáneo.

Hoxe, cando todo produto artístico é un ben de consumo, unha mercadoría de compravenda, o traballo deste autor é unha aldrabada que, tal como el pretendía, ‘abre extensas feridas na nosa conciencia'. Kafka namorado tenta traer a escena a imbricación da súa experiencia persoal e a súa obra, o correlato constante dunha noutra, ese espazo intermedio entre realidade e ficción, absurdo e lóxica, que é a verdade do mundo percibida e expresada por Franz Kafka.