Letras divertidas como 'Oso panda' mestúranse con cancións que achegan unha visión sarcástica da realidade política e social do País Vasco e Navarra. A toda velocidade, con esa rabia punk que de cando en cando pasa dos tres minutos por corte e nas que escasean os punteos de guitarra. Pildorazos frenéticos de forza inapelable.

E é que sempre foi así, desde que o grupo comezase a súa andaina alá por 2004 cunha maqueta que superou as 20.000 descargas na súa web oficial. Un deses fenómenos que van de boca a orella correndo coma a pólvora mentres a popularidade de Lendakaris Muertos (nome 'adaptado' dos Dead Kennedys) multiplícase exponencialmente concerto a concerto, primeiro no norte da península e despois xa en todo o país ao ritmo de himnos como 'ETA, deja alguna discoteca'

O seu debut chegou en 2005 cun disco homónimo que era en realidade a maqueta ampliada, perfecta carta de presentación que resume a esencia da banda en media hora de broma, rabia e urxencia. Mesma fórmula de posteriores traballos como 'Se habla español' (2006), 'Vine, vi y me vendí' (2008), 'Crucificados por el antisistema' (2012) e 'Cicatriz en la Matrix' (2012).

Tras doce anos de andaina musical, Lendakaris Muertos son xa un nome clásico no punk rock patrio. O cuarteto integrado por Aitor, Joximi, Jokin e Potxeta conseguiu que a súa proposta cale nos fregueses grazas aos seus certeiros refráns e aos seus suorentos e esgotadores concertos. Demostrando que, ás veces, non tomarse demasiado en serio é o mellor para conseguir que te traten en serio. Entregade as armas, a revolución era isto.

VENDA DE LOCALIDADES

Despacho Central da praza de Ourense: de luns a venres (excepto festivos) de 9.30 a 13.00 e de 16.30 a 19.30 h.

Despacho do Coliseum: aberto só días de concerto desde as 17.00 h ata o inicio do concerto (só se hai localidades dispoñibles)

Televenda: 902 044 226 (de luns a venres de 9.00 a 22.00 h; sábados de 14.00 a 22.00 h; domingos de 16.00 a 21.00 h)