Estes encontros centraranse na palabra nun sentido amplo, abordada sen purismos academicistas, senón con vivacidade, frescura, transversalidade, apertura e desenfado, dende outros camiños ou contaminada con outras linguaxes como a música ou a performance.

O primeiro encontro d'O alfabeto híbrido terá lugar o vindeiro venres 10 de abril ás 22 horas cun programa dobre no que intervirán o músico, compositor e escritor Santiago Auserón, que falará sobre os seus procesos creativos, lerá textos e comentará algunhas pezas xunto coas súas referencias, para, posteriormente interpretalas coa guitarra; e as escritoras Lucía Aldao e María Lado a través da súa formación Aldaolado, que combina poesía con música nun espectáculo que ofrece unha visión diferente, divertida e mesmo iconoclasta da comunicación poética, na que implican activamente os espectadores.