O obradoiro "Lecturas diversas" está orientado a persoas adultas que formen parte dunha familia na que haxa unha persoa con diversidade funcional (nomeadamente, nenos e nenas) e para aquelas persoas interesadas en achegarse a un espazo de aprendizaxe no que libros, lecturas e diversidade van da man. Neste sentido, o taller ofrecerá diferentes recursos para abordar a riqueza da diversidade dende a literatura.

Son os libros inclusivos? Poden selo? De literatura e diversidade na infancia falaranos na Biblioteca Ágora a periodista e mediadora en lectura Sonia Hermida Galán.

Sobre Sonia Hermida Galán

Sonia Hermida Galán é xornalista, con experiencia na xestión de comunicación e creación de contidos, relación con medios, recensións etcétera. Nos últimos doce anos e despois de traballar e colaborar con diversos medios e institucións públicas, a súa experiencia profesional vinculouse ao mundo da educación e a literatura infantil.

Entre a súa experiencia profesional nesta última década destaca a xestión de marcas e tendas de produtos infantís, ademais de impartir formación en comunicación e literatura infantil e fomento lector. Impartiu diversas sesións de narración oral e contacontos. É colaboradora do proxecto educativo "Non violencia. Ti que miras? Actúa!".

Formouse ademais en educación inclusiva, xogo e estimulación, infancia e diversidade, literatura e inclusión, literatura e primeira infancia, aulas inclusivas, mediación lectora. Máster de Literatura Infantil e Xuvenil da Universidade de Zaragoza cun TFM centrado na mediación lectora e criterios de selección literaria na infancia con condición de discapacidade.