Teo é un home duns 35 anos que, tras chegar á súa casa despois dun longo día de traballo, revisando as mensaxes do contestador, escoita unha que fai que o seu pasado volva ser o seu presente. O seu pai morreu na residencia de anciáns onde vivía e envíano á súa casa da aldea para ser enterrado.

A última vez que Teo viu ao seu pai foi hai uns meses e despois de moitos anos. Tantos como os que facía que saíu pola porta da súa casa, abandonándoos, tras unha acesa pelexa coa súa nai enferma e que el escoitou desde a habitación.

No camiño á aldea da súa infancia, Teo volverá revivir eses momentos, así como instantes da súa adolescencia que o marcaron pola soidade. A soidade, o medo, a tristeza, o rancor, o abandono, o amor... Son os ingredientes que dan forma a esta historia chea de sen sabores e que deixan entrever a valentía das persoas cando sabemos que aínda temos a alguén.