O Aquarium Finisterrae organiza unha visita guiada temática polas súas instalacións para o 5 de xuño, Día Mundial do Medio Ambiente.

Co título «Sinais de alarma», esta actividade propoñerá un itinerario pola Sala Maremagnum, onde se presentará e comentará un variado conxunto de procesos e transformacións ambientais que se están producindo no noso planeta, especialmente en relación coas contornas mariñas. Abordaranse cuestións como a acidificación das augas, a contaminación mariña, as especies invasoras, a sobrexplotación dos recursos naturais ou a ruptura dos equilibrios ambientais.

A actividade comezará ás 17.30 h do xoves 5 de xuño e para participar hai que acudir ao Aquarium Finisterrae, pagar a entrada ao museo que corresponda a cada persoa e sumarse ao evento. A visita guiada está limitada a 50 prazas e terá unha duración dunha hora.