Este evento vénse realizando ininterrompidamente dende o ano 2001, sendo un referente non só na Coruña senón en Galicia, e a única que se celebra na actualidade ao aire libre. Edición tras edición, a Feira das Artes Plásticas bate todos os récords, tanto respecto á participación de artistas, con técnicas e estilos moi variados (pintura, escultura, fotografía e artes gráficas en xeral), como en asistencia de público: 80.000 persoas visitárona o pasado ano. A Feira non se limita a expoñer as obras dos seus artistas, senón que tamén ten como obxectivo fomentar a práctica da arte entre o público, permitindo a participación de nenos e adultos, gratuitamente, en diferentes talleres de gravado, e organizando un concurso de pintura infantil ao aire libre no cal todos os participantes recibirán un pequeno agasallo da Asociación ARGA.