A Orquestra Sinfónica de Galicia ofrece mañá ás 12.00 horas no Coliséum un concerto coas persoas gañadoras do Concurso de Interpretación Solista organizado polo Conservatorio Superior de Música da Coruña e a propia formación. A alumna e o alumno distinguidos neste certame foron a pianista Hiwot Vilariño García, que interpretará o "Concerto número 27", de Mozart, e o fagotista Esteban García Vidal, que tocará o "Concerto para fagot", de Mozart, baixo a dirección de José Trigueros. A iniciativa, que se realiza no marco do convenio de colaboración subscrito entre ambas as institucións, pretende difundir o elevado nivel de excelencia que atesoura o estudantado do Conservatorio Superior coruñés e a Sinfónica de Galicia. A través do concurso, as e os mozos premiados teñen a oportunidade de actuaren cunha orquestra de gran prestixio. É unha forma de lles recompensar todo o traballo e o esforzo realizado durante o ano.