Hoxe ábrese na praia de Riazor o posto que acolle o programa de educación ambiental que impulsa o Concello durante a tempada estival, que ten como obxectivo achegar ao público de todas as idades a actividades de divulgación sobre o respecto á contorna natural. 

A caseta funciona durante os meses de xullo e agosto en horario de mañá, e para acceder ás súas actividades hai dúas vías. Por unha banda, calquera persoa pode achegarse ao posto-situado xunto ao posto de seguridade dos socorristas na praia de Riazor-, a participar en actividades e talleres ou a tomar prestado un libro para a súa xornada de praia, mais tamén é posible reservar en liña actividades para grupos a través do correo electrónico educacionambiental@coruna.gal.

A concelleira de Medio Ambiente, Yoya Neira, visitou hoxe ao persoal que atende a caseta, na xornada inaugural deste veterano programa de educación ambiental, que tamén é unha das circunstancias destacadas pola Asociación de Educación Ambiental e do Consumidor (ADEAC) para concederlle a bandeira azul ás praias urbanas da Coruña.

"Levar a educación ambiental a pé de praia amosa o compromiso do Goberno municipal para achegar a educación ambiental a todos os públicos, sexa cal sexa a súa idade e en todos os espazos públicos", destacou Neira.

Nesta edición, a instalación acolle unha exposición sobre a contaminación de plásticos no mar e conta cunha 'biblioteca verde' en colaboración co servizo de Bibliotecas Municipais, outras dúas iniciativas promovidas coa finalidade de concienciar a escala interxeracional.

Ademais, na caseta, o Concello ofrece un amplo abano de actividades para todas as idades, impartidas por monitores formados en Educación Ambiental, co respecto ao mar, a biodiversidade e o coidado da contorna como eixes condutores. A iniciativa forma parte da ampla oferta educativa e formativa que o Goberno de Inés Rey deseñou este verán para todas as idades.