Alan Parsons, o lendario músico, produtor e enxeñeiro de son recoñecido mundialmente, estará este próximo martes 24 no Palacio da Ópera para presentar o seu aclamado espectáculo en directo. As últimas entradas para este evento, único en Galicia, continúan á venda a través do despacho de billetes da praza de Ourense, Ataquilla e a billeteira do propio recinto.

"Desde o Goberno de Inés Rey continuamos a amosar o noso potencial como cidade para acoller eventos de gran relevancia musical e artistas de todos os xéneros e xeracións", indicou Gonzalo Castro, concelleiro de Cultura e Turismo. Esta actuación supón unha oportunidade excepcional para experimentar a música dun verdadeiro "mestre sónico do rock progresivo", gañador dun premio Grammy. Cunha carreira que abrangue décadas, Alan Parsons comezou a súa andaina nos icónicos estudios Abbey Road, onde traballou como enxeñeiro asistente nos últimos álbums de The Beatles e foi o enxeñeiro do fundamental 'The Dark Side Of The Moon' de Pink Floyd. Como produtor, logrou éxitos notables con artistas como Al Stewart (Year Of The Cat), Pilot, John Miles e Steve Harley. 

En 1975, cofundou The Alan Parsons Project xunto a Eric Woolfson, creando unha serie de álbums que definiron unha era, incluíndo 'Tales Of Mystery And Imagination', 'I Robot', 'Pyramid' e o mundialmente famoso 'Eye in the Sky'. Tras a disolución do Project, Parsons continuou a súa carreira en solitario e co Alan Parsons Live Project, levando a súa música a audiencias de todo o mundo. 

No concerto da Coruña, no marco do 'The Show Must Go On Tour', Parsons (teclado, guitarra e voces) estará acompañado pola súa banda actual: P.J. Olsson (voz), Tom Brooks (teclados), Guy Erez (baixo e voces), Jeff Kollman (guitarra e voces), Danny Thompson (batería) e Todd Cooper (saxo, percusión e voces). Interpretarán os grandes éxitos da súa carreira nun espectáculo que combina mestría musical e innovación tecnolóxica. 

Ademais das súas 13 nominacións aos Grammy e outros galardóns como o Les Paul Award o Grammy ao Mellor Album de Audio Inmersivo (2019), Parsons é autor da serie didáctica 'The Art & Science Of Sound Recording' e participou activamente en causas benéficas como o evento 'One 805 KICK ASH BASH'.