Unha proposta artística que recolle 24 pezas en forma de carteis, correspondentes a autoras e autores que, nos anos da Transición, en clave política e cultural, lembraron o legado de Picasso.

A exposición, xa aberta ao público, terá continuidade ata o xoves 30 de novembro, reforzando o abano de iniciativas promovidas no contexto da 'Celebración Picasso 1973-2023', que conmemora o 50.º aniversario do falecemento do artista malagueño, que pasa parte da súa infancia na Coruña.

Neste sentido, a listaxe de pezas, todas creadas no ano 1977, destacan pola súa diversidade estilística. Hai carteis elaborados a base de colaxe e aerógrafo sobre cartolina, outros con tinta e gouache, e algúns onde o autor traballou con rotulador e ceras. Son, en todo caso, traballos que, ademais de mostrar unha admiración ao traballo e conceptos de Picasso, tamén mostran o compromiso político dos seus creadores para cos tempos de cambio que estaban a vivir, no contexto das primeiras eleccións libres que tiñan lugar no país desde os tempos da Segunda República, coa ditadura entre medias.

Para a creación do cartel correspondente a esta mostra, que inclúe a autoras e autores cataláns, madrileños e aragoneses, foi fundamental o traballo de José María Calzada Dalmases 'Kaydeda', recoñecido artista multidisciplinar, escritor e coleccionista que mobilizou as e os profesionais plásticos con sede en Cataluña para lle ir dando forma á selección de carteis. Desta forma, o público que se achegue a gozar da mostra poderá contemplar as creacións de Asensi, Dámaso Soler, Elvira Fustero, Pedro Díez Gil, Amelia Riera, Fernando Soriano, Esther Boix, Concha Ibáñez ou do propio 'Kaydeda', entre outras e outros.